असोज ३, वालिङ स्याङ्जा ।  वालिङ नगरपालिकाका नगरप्रमुख दिलीप प्रताप खाँणले केन्द्रीय सरकारको कारण संविधान कार्यान्वयनमा ढिलाई भएको बताउनु भएको छ ।  संविधान दिवशको अवसरमा पैयुँ पोष्ट संग कुरा गर्दै नगरप्रमुख खाँणले संविधान बनेपछि जनताले शान्ति र सुसासन सहितको समृद्धी चाहेका थिए तर केन्दीय सरकारले संविधान कार्यान्वयन गर्न ध्यान नै नदिदा जनताका अपेक्षा पुरा हुन नसकेको बताउनु भएको हो ।

 

सिंहदरबार गाउँगाउँमा भन्ने नारा भएपनि त्यसलाई सफल बनाउन नसकेको भन्दै नगरप्रमुख खाँणले संविधान निर्माण गरेपनि कार्यान्वयन गर्ने पक्षमा केन्द्रीय सरकार नलागेको बताउनु भयो । सरकारले ऐन निर्माण गरेपनि कार्यान्वयन गर्न नियमावली र कार्यबिधि नबनाएको भन्दै उहाँले कार्यान्वयन गर्नतर्फ ध्यान दिएर काम गर्न केन्द्रीय सरकारलाई आग्रह गर्नु भयो । केन्द्रीय सरकारको दृढ इच्छाशक्ति नहुदा संविधान कार्यान्वयनमा ढिलाई भएको उहाँको भनाई छ । 

 

 

साथै नगरप्रमुख खाँणले स्थानिय तहलाई दिइएका एकल र संयुक्त अधिकारहरु स्थानिय तहमा हस्तान्तण नभएको समेत गुनासो गर्नु भएको छ । संविधानमा स्थानिय तहलाई भनेर छुट्याईएको अधिकार केन्द्रीय सरकले हस्तान्तरण नगरेको  भन्दै छिटो हस्तान्तरण गर्न समेत आग्रह गर्नु भयो । 

केही ऐनहरु  विकास निर्माणमा बाधा पुर्याउने खालका भएको कारण त्यस्ता ऐनहरुलाई संसोधन गर्नु पर्ने समेत खाँणले बताउनु भयो ।