मंसिर १०, स्याङ्जा । स्याङ्जाको वालिङमा लैङ्गिक हिंसाविरुद्धको १६ दिने अभियान शुरु भएको छ । विहीबार वालिङमा र्याली र रिवन लगाई लैगिक हिंसा विरुद्धको १६ दिने अभियानको शुरुवात गरिएको हो । लैगिंक हिंसा विरुद्धको दिवसको सुरुवात गर्दै वालिङ नगरपालिकाका नगर प्रमुख दिलिप प्रताप खाँणले लैगिक हिंसा विरुद्ध विभिन्न समयमा गरिएका प्रतिबद्धताका बाबजुद पनि देशमा यस प्रकारका हिंसा बढ्नु र पीडितले न्याय नपाउनु गम्भीर विषय भएको बताउनुभयो ।
महिला र पुरुषबीच असमान शक्ति सम्बन्ध, महिला अधिकारका बारेमा न्यून चेतना तथा हिंसामा परेकाहरुले प्राप्त गर्ने सीमित न्याय लगायतका कारण हिंसा न्यूनीकरण हुन नसकेको प्रमुख खाँणले बताउनुभयो ।
महिलाहरुलाई राजनीतिमा पनि हिंसा–तिवारी
कार्यक्रममा वालिङ नगरपालिकाका उपप्रमुख कल्पना तिवारीले महिलाहरुले राजनीतिमा पनि हिंसा भोग्नु परेको बताउनु भयो । महिलाहरुलाई राजनीतिमा पनि हिंसा भोग्नु परेको छ तर यसलाई रोक्न महिला पुरुष सबै लाग्नु पर्ने बताउनु भयो । विभिन्न कु–संस्कारले गर्दा समाजमा हिंसाका घटनाहरु भईरहेका छन त्यसलाई न्युनिकरण गर्न सबै लाग्न तिवारीले आग्रह गर्नु भयो ।
कार्यक्रममा वालिङ नगरपालिकाका प्रमुख प्रशासकीय अधिकृत राजन भट्टाराईले लैंगिक हिंसाविरुद्ध विभिन्न खालका सचेतना कार्यक्रम अघि बढाउनुपर्ने बताउनुभयो । उहाँले नेपालमा महिला हिंसा बढी रहेको कारण हिंसालाई प्रतिवाद गर्ने र समन्यायिक समाज बनाउन यस्ता कार्यक्रमहरु गर्नु पर्ने बताउनु भयो । उहाँले १६ दिन भित्र अन्य कार्यक्रमहरु पनि गर्ने बताउनु भयो ।
सन् १९६० मा डोमिनिकन गणतन्त्रका मिरावेल परिवारका तीन जना दिदीबहिनीलाई तत्कालीन त्रुजिलो तानाशाही सरकारले निर्मम हत्या गरेको थियो । उक्त हत्यालाई लिङ्गका आधारमा हुने राजनीतिक हिंसाको रूपमा लिने गरिन्छ ।
एकै परिवारका तीन जना दिदीबहिनी पेट्रिया, मिनर्भा र मारियाको हत्यालाई महिलाविरुद्धको हिंसाको रूपमा लिएर उनीहरूको सम्मान र सम्झनाका लागि १६ दिने अभियान मनाउन थालिएको हो ।
