वालिङ, ३० वैशाख ।
विभिन्न रोगको परीक्षणका लागि स्याङ्जाको वालिङमा ३ सय ५० जनाको रगत सङ्कलन गरिएको छ । लायन्स क्लव अफ वालिङ ग्रीन होमको व्यवस्थापन र लायन्स क्लव अफ पोखरा सेन्ट्रल टाउन तथा पोखरा सुपर स्पेशियलिटी हेल्थ क्लिनिकको आयोजनामा किड्नी, डाएविटिज र थाइरोइडको परीक्षणका लागि नमूना रगत सङ्कलन गरिएको हो ।

मङ्बार सङ्कलन गरिएको नमूना रगत पोखरा लगेर परीक्षण गरिने छ । जेठ २ गते वालिङमा हुने निःशुल्क हेल्थ क्याम्पमा विशेषज्ञ चिकित्सकहरुद्वारा वृहत स्वास्थ्य परीक्षण तथा परामर्श सेवा कार्यक्रमका लागि नमूना रगत सङ्कलन गरिएको हो । उक्त क्याम्पमा विशेषज्ञ चिकित्कहरुद्वारा निःशुल्क परीक्षण तथा परामर्श गरिने लायन्स क्लव अफ वालिङ ग्रीन होमले जानकारी दिएको छ ।

३ सय जनाको नमूना रगत सङ्कलन गर्ने कार्यक्रम रहेकोमा  तोकिएको भन्दा धेरैको रगत सङ्कलन गरिएको छ । कार्यक्रममा महिला र पुरुष गरी ३ सय ५० जनामो नमूना रगत सङ्कलन गरिएको हो । नमुना रगत सङकलन गरिएकाहरुमा २ सय २३ जना महिला र १ सय २७ जना पुरुष रहेका छन् भने परीक्षणका लागि पोखरा पठाइएको लायन्स क्लव अफ वालिङ ग्रीन होमका जोन चेयर पर्शन माधव कँडेलले जानकारी दिए । वालिङस्थित सिटीहलमा गरिएको नमूना रगत सङ्कलन कार्य पोखरा सुपर स्पेशियलिटी हेल्थ क्लिनिकका प्राविधिकहरुबाट गरिएको हो ।

बृहत स्वास्थ्य परीक्षण तथा परामर्श कार्यक्रम नमूना रगत सङ्कलन गरिएकै स्थान वालिङस्थित सिटीहलमा नै गरिने आयोजकले जनाएको छ । जेठ २ गते विहान ९ बजेदेखि बृहत स्वास्थ्य परीक्षण तथा परामर्श गरिने छ ।