माघ ९, वालिङ । सामुदायिक विद्यालयमा व्यवस्थापन समिति गठन गर्दा अनावश्यक रुपमा राजनीतिक हुने कारण शिक्षामा सुधार नआएको भन्दै स्याङ्जाको वालिङ नगरपालिकाले विद्यालय व्यवस्थापन समिति गठन गर्न नयाँ अभ्यास सुरु गरेको छ ।
नगरपालिकाले शुक्रबार नगरभित्र रहेका ७२ वटा सामुदायिक विद्यालयमा एकै साथ व्यवस्थापन समिति गठन गरेको छ । नगरपालिकाले एकैदिन एकैपटक एउटै समयमा आधारभुत र मावि विद्यालयहरुमा व्यवस्थापन समिति गठन गरेको हो ।
समितिमा एकरुपता गराउन र स्वतन्त्र ढंगले समिति गठन गरी विद्यालयमा राजनीति हस्तक्षेप नहोस भन्ने उद्देश्यले एकैपटक विद्यालय व्यवस्थापन समिति गठन गर्न यो अभ्यास शुरु गरेको वालिङ नगरपालिकाका प्रमुख प्रशासकिय अधिकृत जिवन ज्ञवालीले बताउनु भएको छ ।
नगरपालिकाले ७२ जना कर्मचारीलाई विद्यालय व्यवस्थापन समिति गठन गर्न अभिमुखीकरण तालिम दिएर सबै विद्यालयमा पठाएको थियो । ३ बर्षका लागि हुने समिति ९ जनाको हुनेछ । वालिङ नगरभित्र १६ मावि, ८ निमावि र ४८ प्रावि गरी ७२ वटा सामुदायीक विद्यालय रहेका छन् ।
शिक्षामा सुधार ल्याउन र विद्यालयमा राजनिति हस्तक्षेप बन्द गर्न वालिङ नगरपालिकाले सुरु गरेको यो अभ्यासबाट अन्यले पनि केही सिक्ने कि ?
