आश्विन ६,रामपुर ।पूर्वी पाल्पाको रामपुर नगरवासीहरुले जग्गाधनि पूर्जा पाउने भएका छन् ।रामपुरको बेझाँड बजारलगायतका क्षेत्रमा वर्षौदेखि बस्दै आएका सयौं नागरिकहरु अहिलेम्म पनि लालपूर्जा बिहिन थिए । नगरपालिका बन्नुभन्दा पहिला तत्कालिन गाविस तथा संघ संस्थाहरुबाट जग्गा किनेर बसेकाहरुले लालपूर्जा पाउने भएका हुन् । यसका लागि जिल्ला तथा केन्द्रसँगको समन्वय गरी आँफ्नो अध्यक्षतामा आयोग गठन गरेर लालपूर्जा उपलव्ध गराउने कार्य अगाडि बढाइएको नगर प्रमुख रमणबहादुर थापाले बताउनुभयो ।
उहाँका अनुसार ७ सय ८३ जनालाई लालपूर्जा प्रदान गरिने छ । आश्विन पहिलो हप्ता करिव ४ सय जनालाई दिने तयारी गरिएको थियो तर तत्कालका लागि रोकिएको छ । निर्वाचन आयोगले यी सबै कामहरु रोक्का गर्नु भनेर निर्देशन गरेकाले केहि समय स्थगित भएको नगर प्रमुख थापाले जानकारी गराउनुभयो । यही मंसिर ४ गते हुने संघ र प्रदेशको निर्वाचन लगत्तै लालपूर्जा वितरण गरिने उहाँले उल्लेख गर्नुभयो ।वषौंदेखि भूमिहिन भएर बसेका नागरिकहरुलाई लालपूर्जा उपलव्ध गराउने महत्वपूर्ण भूमिका निर्वाह गरेकोमा गर्व लागेको नगर प्रमुख थापाले बताउनुभयो ।
दोश्रो कार्यकालका लागि निर्वाचित भएको १ सय दिन पार गरेको अवसरमा नगरपालिकाका गतिविधि जानकारी गराउँदै नगर प्रमुख थापाले यो वर्ष कालिगण्डकीको संरक्षणसहित मौलिक सहरको व्यावस्थापनलाई प्राथमिकता दिइने बताउनुभयो ।उहाँका अनुसार रामपुरलाई मौलिक सहरकारुपमा घोषणा भैसकेको छ । ऐतिहासिक र धार्मिक तथा सांस्कृतिक महत्व रहेको कालिगण्डकी नदिको संरक्षण गर्दै मौलिक सहर व्यवस्थापनमा लाग्ने नगरपालिकाको योजना छ ।यो वर्ष कालिगण्डकीको तीरतिरै फुटपाथहरु निर्माण गर्ने र ठाउँ ठाउँमा ठाँटी पौवाहरु बनाउने काम अगाडि बढाइने नगर प्रमुख थापाले बताउनुभयो । उहाँले भन्नुभयो—“ठाउँ ठाउँमा शौचालयहरु बनाउने, विश्राम स्थल निर्माण गरेर पर्यटन प्रवद्र्धनलाई बढावा दिने योजना छ । जति धेरै पर्यटकहरु भित्¥याउन सक्यो त्यति नै बढि प्रचार प्रसारसहितको विकास गर्न सकिन्छ भन्ने विश्वास लिएका छौं । विशेष गरी रामदीदेखि पोखरासम्म जलयात्रासहितको मार्ग बनाउने र आन्तरिक तथा बाह्य पर्यटकलाई आकर्षित गरिने छ ।”
छिमेकि देश भारतका पर्यटकहरुलाई आकर्षित गर्न सकिने नगर प्रमुख थापाको विश्वास छ । उहाँका अनुसार भगवान रामले १२ वर्षको वनवासका समयमा विश्राम गरेका विभिन्न स्थानहरु र गुफा तथा झरनाहरु छन्, यसको राम्रो व्यवस्थापनसहित पहिचान गराउन सकियो भने साच्चै रामपुर नगरपालिकालाई मौलिक सहर बनाउन सकिन्छ ।
यसका साथै नगरपालिकालाई पर्यटकीय हवकोरुपमा विकास गर्न सकिने नगरपालिकाको विश्वास छ ।यसैगरी सरकारको नीति अनुसार कृषियोग्य जमिन, गैर आवादी, आवासीय लगायत जग्गाको वर्गिकरणको काम गरिने नगर प्रमुख थापाले जानकारी गराउनुभयो ।