फागुन २६, वालिङ
आँधीखोला संचार सहकरी संस्था लिमिटेड तथा रेडियो आँधीखोला १०५.४ मेगाहर्ज वालिङ ८ ले रेडियो वितरण गरेको छ । संस्थाको १८औँ वार्षिक साधारण सभा तथा छैटौँ अविधेशनको अवसरमा आफ्ना सदस्यहरुलाई रेडियो वितरण गरेको हो । सञ्चार जगतमा रेडियोको भूमिका अतुलनीय रहेको भन्दै पछिल्लो समय सामाजिक संजालहरुको विकास भईरहेका बेला रेडियोलाई समय सापेक्ष अगाडि बढाउँदै रेडियो सुन्ने बानीको विकास गर्न रेडियो वितरण गरिएको संस्थाले जनाएको छ ।
शनिबार संस्थाको १८ औं वार्षिक साधारणसभा तथा छैटौं अधिवेशनको उद्घाटन गर्दै गण्डकी प्रदेशका अर्थ विकास समितिका सभापति भोजराज अर्यालले रेडियोको माध्यमबाट नागरिकलाई सचेत गराएको बताउनुभयो । रेडियोले देश विदेशमा भईरहेका घटनाक्रमलाई नजिकबाट नियाल्ने अवसर प्राप्त गरेको गण्डकी प्रदेशका अर्थ विकास समितिका सभापति अर्यालले उल्लेख गर्नुभयो ।
२०६३ सालमा स्थापना भएको रेडियो आँधीखोला स्याङ्जामै पहिलो संचार संस्थाको रुपमा स्थापित भई अहिलेसम्म निरन्तर रुपमा नागरिकलाई सुसूचित बनाउँदै आएको सभापति अर्यालले औंल्याउनुभयो ।
शनिबार साधारणसभा सम्पन्न गरेको संस्थाले नयाँ सञ्चालक समितिको चयनका लागि निर्वाचनको कार्यक्रम आइतबार गर्ने भएको छ । आइतबार बिहान ८ बजे उमेदवारी मनोनयन गरिने छ भने दिउसो ११ बजेदिखि निर्वाचन प्रकृया अन्तर्गत मतदानको कार्यक्रम अगाडि बढाइने निर्वाचन समितिका संयोजक ध्रुव शर्मा पङ्गेनीले जानकारी गराउनुभयो ।
