चैत १७, वालिङ
स्याङ्जाको फेदिखोलामा रहेको अमोर सेवा बालगृहले १२ औं वार्षिकोत्सव मनाएको छ । फेदिखोला गाउँपालिका वडा नम्वर १ कटुजेस्वाँरामा रहेको बालगृहले शनिबार आफ्नो १२ औं वार्षिकोत्सव मनाएको हो ।
वार्षिकोत्सवका अवसरमा पोखरा महानगरपालिका वडा नम्वर २२ का हुमादेवी बरालले अक्षयकोष स्थापनाका लागि रु. ९० हजार १ सय १ प्रदान गर्नुभयो । बरालले आफ्ना श्रीमान छविलाल उपाध्याय बरालको स्मृतिमा बालगृहलाई अक्षयकोष स्थापनाका लागि उक्त रकम प्रदान गर्नुभएको हो ।
कार्यक्रममा गण्डकी प्रदेश सभासद सुधीरकुमार पौडेलले जिल्लाका महत्वपूर्ण स्थानहरु मध्ये अमोरसेवा नेपाल बालगृह पनि जिल्लाकै महत्वपूर्ण र हामी सबैले  दृष्टि दिनुपर्ने संस्था रहेको बताउनुभयो । जिल्लाकै ऐतिहासिक र सांस्कृतिक महत्वको नुवाकोटलाई मानिन्छ भने त्यस्तै अमोर सेवा बालगृह पनि अनाथ बालबालिकाहरुको एकमात्र आश्रय स्थल रहेको प्रदेश सांसद पौडेलले उल्लेख गर्नुभयो । आफ्नै घरमा बाबा आमाको काखमा रहेका बालबालिका भन्दा यहाँका बालबालिकाहरुमा कुनै कमि छैन, बरु थप प्रतिभाशाली भएको आँफूले पाएको उहाँले व्यक्त गर्नुभयो । तल्लो तहदेखि उच्च शिक्षासम्म अध्ययनरत बालबालिकाहरुमा पढाईसँगै विविध कला कौशलतामा सक्षम रहेका भन्दै प्रदेश सांसद पौडेलले बालगृह सञ्चालक र बालबालिकाहरुको प्रशंंसा गर्नुभयो । सिद्धार्थ राजमार्गदेखि बालगृहसम्मको सडक विस्तारका लागि गत आर्थिक वर्षमा केही बजेट परेको र आगामी आर्थिक वर्ष थप व्यवस्थापनका लागि पहल गर्ने विश्वास उहाँले व्यक्त गर्नुभयो ।कार्यक्रममा प्रमुख जिल्ला अधिकारी सुनिता नेपालले बालबालिकाहरुकोसाथमा बाह«ौं वार्षिकोत्सवको केक काट्नुभएको थियो । वार्षिकोत्सवको केक काट्दै प्रमुख जिल्ला अधिकारी नेपालले घरमा एउटा बच्चा हुकाउन कति गाह«ो हुन्छ भने झण्डै तीन दर्जन बालबालिकालाई यति राम्रोसँग हेरचाह गरेर सक्षम बनाउनु सराहनीय रहेको बताउनुभयो । आँफू जन्मेको पहिलो घरमै हुनुपथ्र्यो, वाध्यताले यो दोस्रो घरमा आउनुपरेको छ, तर पनि कुनै कुरामा कमि नगराईकन संरक्षण गरिएको छ । आगामी दिनमा बालगृहका लागि के सहयोग गर्नुपर्छ, त्यसको लागि आँफ्नो तर्फबाट साथ सहयोग रहने प्रमुख जिल्ला अधिकारी नेपालले प्रतिवद्धता व्यक्त गर्नुभयो ।यसैगरी अध्यक्ष कमला पराजुलीले बालगृहको गतिविधीसहित जानकारी गराउनु भएको थियो । यस अवसरमा बालबालिकाहरुको नृत्यसहित विविध प्रस्तुति रहेको थियो ।अमोर सेवा नेपाल बालगृहमा स्याङ्जासहित पर्वत, रुकुम र मुगुका गरी ३३ जना बालबालिका छन् । उनिहरुको पढाई लेखाईसहित सम्पूर्ण लालनपालनको काम बालगृहले गर्दै आएको छ ।
कार्यक्रममा बालगृहलाई विगतका दिनमा सहयोग गर्ने सहयोगदाताहरुलाई सम्मानसमेत गरिएको थियो ।