जेठ ४, वालिङ
स्याङ्जाको वालिङ नगरपालिका र धनुषाको मिथिला नगरपालिकाले न्यायिक समिति र मेलमिलापकर्ताबीच सिकाई आदान प्रदान गरेका छन् । वालिङ नगरपालिकाले न्यायिक क्षेत्रमा गरेका कार्य सम्पादनको विषयमा मिथिला नगरपालिकाका न्यायिक समिति र मेलमिलाप कर्ताहरु अवलोकन भ्रमणका लागि वालिङ आएका हुन् । भ्रमण टोलीले वालिङका वडाहरुमा रहेका मेलमिलाप केन्द्रहरुको समेत अवलोकन गरेको छ ।
वडा नं. १, २, ५, ७, ८ र ९ मा रहेका मेलमिलाप केन्द्रहरुको अवलोकनसहित न्यायिक समिति, वडा अध्यक्षहरु, मेलमिलाप संयोजकहरु, कार्यपालिका सदस्यहरुबीच अन्तरक्रिया गरिएको हो । कार्यक्रममा नगरप्रमुख कृष्ण खांँणले वालिङमा न्यायिक क्षेत्रमा भएको असल अभ्यासको विषयमा जानकारी लिने उद्देश्यले मिथिलाले वालिङलाई रोजेकोमा धन्यवाद व्यक्त गर्नुभयो । पालिकाहरुले आँफूले गरेका असल अभ्यासका विषयमा एकआपसमा सिकाई आदानप्रदान गर्दा थप प्रभावकारी हुने भएकाले यस्ता गतिविधिलाई अगाडि बढाउनुपर्ने धारणा राख्नुभयोे ।
कार्यक्रममा वालिङ नगरपालिका उपप्रमुख कविता तिवारीले वालिङले अहिलेसम्म गरेका न्यायिक सम्पादनका विषयमा प्रस्तुतीकरण गर्नुभएको थियो । वालिङका १४ वटा वडामा १ सय १ जना मेलमिलाप कर्ताहरुमा सम्पूर्ण वर्ग र समुदायको प्रतिनिधित्व रहेको उपप्रमुख तिवारीले बताउनुभयो । कानुनी साक्षरता समुदायदेखि विद्यालयस्तरसम्म पु¥याईएको भन्दै हरेक महिनाको २८ गते कार्यसम्पादनका विषयमा छलफल गर्दै आएको उहाँले उल्लेख गर्नुभयो ।
नगरपालिकामा कानुन शाखा मार्फत ईजलासबाट हरेक महिनाको सोमबार र बुधबार न्याय सम्पादन गर्ने गरिएको उहाँले बताउनुभयो । उहाँले मेयरसंँग जेष्ठ नागरिक सम्मान कार्यक्रम, नगरलाई मासु, दुध र तरकारीमा आत्मनिर्भर बनाउने योजना बनाएको जानकारी गराउनुभयो । 
कार्यक्रममा मिथिला नगरपालिका उपप्रमुख सुनिता सिंह बुढाथोकीले नगरपालिकामा भएका न्यायिक सम्पादनका विषयमा प्रस्तुति राख्नुभएको थियो । भौगोलिक वनावटका आधारमा मुद्धाका प्रकृतिसमेत फरक फरक रहेको उल्लेख गर्दै मिथिलामा लेनदेन, मिटर व्याज, साँधसिमाना, दाईजो प्रथा, बालविवाहलगायतका घटनाहरु बढी आउने गरेको उपप्रमुख बुढाथोकीले जानकारी गराउनुभयो । 
