रामपुर नगरपालिकाद्वारा एकीकृत घुम्ती शिविर मार्फत सेवा प्रवाह
जेठ १४, वालिङ
पाल्पाको रामपुर नगरपालिकाले विभिन्न सेवा सहितको एकिकृत घुम्ती शिविर मार्फत सेवा प्रवाह गरेको छ । नगरपालिकाले वडा नं. ९ को आधारभूत स्वास्थ्य केन्द्र जब्गादीमा आइतबार शिविर सञ्चालन गरी सेवा प्रवाह गरेको हो । नगरपालिकाबाट प्रदान गरिने विभिन्न सेवाहरु शिविर मार्फत वडा मै पुगेर प्रदान गरिएको हो । शिविर मार्फत योजना फरफारक र भुक्तानी, आँखा, कान दाँत सम्बन्धी स्वास्थ्य परीक्षण, व्यवसाय दर्ता तथा नविकरण, कृषि तथा पशुपंछि सम्बन्धी परामर्श र औषधी वितरण,ज्येष्ठ नागरिक तथा अपाङ्ग परिचयपत्र वितरण लगाएतका सेवा प्रदान गरिएको छ ।
जनताको सेवा सहजताका लागि एकिकृत घुम्ति शिविर कार्यक्रम गरिएको नगर प्रमुख रमण बहादुर थापाले बताउनुभयो । विभिन्न सेवा लिन नगरपालिकाको कार्यालयसम्म पुग्न दुरीका हिसाबले टाढा रहेका वडाहरुमा घुम्ति शिविर मार्फत सेवा प्रदान गर्दै आएको उहाँले बताउनुभयो । “सिंहदरबारको अधिकार गाउमा भन्ने नारालाई सार्थक बनाउन विभिन्न स्थानमा शिविर सञ्चालन गरिएको हो ,। उहाँले भन्नुभयो – शिविर मार्फत् नगरपालिकाको कार्यालयबाट प्रवाह हुने सबै सेवा घर आँगनबाटै सहज र सरल रुपमा प्रदान गर्दै आएका छौँ ।” साथै नगरपालिकाको सेवालाई अझ सेवाग्राहीमूखी र नागरिकमैत्रि बनाउनका लागि शिविरको महत्वपूर्ण भूमिका रहने उहाँले उल्लेख गर्नुभयो । 
कार्यक्रममा नगरपालिकाका उपप्रमुख बालकुमारी थापाले नगरपालिकाको कार्यालयसम्म पुग्न बढि समय लाग्ने वडाका नागरिकहरुलाई मध्यनजर गरेर शिविर सञ्चालन गरिएको बताउनुभयो । नगरबासीको आवश्यकता र आपूmलाई पायक पर्ने एकै स्थानबाट सबै सेवा प्रदान गर्न शिविर आयोजना गरिएको उहाँको भनाई छ ।
