असार ७, वालिङ
स्याङ्जाको बिरुवा गाउँपालिकाले १५ औं गाउँसभा गरेको छ । गाउँपालिकाले आर्थिक वर्ष २०८१÷०८२ को नीति तथा कार्यक्रमसहित आज शुक्रबार १५ औं गाउँसभा गरेको हो । गाउँसभाको पहिलो वैठकद्वारा आर्थिक वर्ष २०८१÷०८२ को नीति तथा कार्यक्रम सर्वसम्मत पारित भएको छ ।
कार्यक्रममा गाउँपालिकाका अध्यक्ष सूर्यबहादुर कुँवरद्वारा पूर्वाधार विकास, कृषि तथा पशुपंक्षी, स्वास्थ्य, शिक्षा, खेलकुद, पर्यटन एवम् उद्यमशीलतालगायतका विषय समेटेर आर्थिक वर्ष २०८१÷०८२ को नीति तथा कार्यक्रम प्रस्तुत गर्नुभएको थियो । 
अध्यक्ष कुँवरद्वारा प्रस्तुत नीति तथा कार्यक्रममा योजनावद्ध विकासको आवश्यकता, महत्व, र त्यसबाट प्राप्त हुने उपलव्धीको आधारमा योजनाहरुको प्राथमिकता निर्धारण गरी बजेट व्यवस्था र कार्यान्वयनको नीति लिइने उल्लेख गरिएको छ । यसैगरी गतवर्ष निर्माण भएका योजना, मापनयोग्य र सूचकमा आधारित विकासको नीति लिइने छ । आर्थिक विकासमा उद्योग तथा पर्यटन विकास, कृषि तथा पशुपंक्षी, सहकारी, गरिवी निवारण तथा रोजगारीसँग सम्बद्ध विषय समेटिएको छ । 
यसैगरी सामाजिक विकासमा शिक्षा, संस्कृति, युवा तथा खेलकुद, लैङ्गिक समानता र सामाजिक समावेशिकरण, स्वास्थ्य, खानेपानी तथा सरसफाई, महिला, बालबालिका, अपाङ्ग, जेष्ठ नागरिक सम्मान एवम् संरक्षणलाई नीति तथा कार्यक्रममा समावेश गरिएको छ । यस्तै गरेर पूर्वाधार विकासमा स्थानीय सडक तथा झोलुङ्गे पुल निर्माण र भवन तथा शहरी विकास, उर्जा, सञ्चारलाई नीति तथा कार्यक्रमले प्राथमिकता दिएको छ । यस अन्तर्गत “जनताको योजना, जनताकै साझेदारीमा” जस्ता लोकप्रिय कार्यक्रम समावेश गरिएको छ । यस्तैगरी सुशासन, सार्वजनिक सेवा तथा क्षमता विकास, सूचना तथा प्रविधिको विकास, न्याय कानून तथा मानव अधिकार जस्ता विषय समेटिएका छन् ।
१५ औं गाउँसभामा प्रस्तुत नीति तथा कार्यक्रममा योजनावद्धरुपमा कार्यान्वयनमा ल्याइने उल्लेख गरिएको छ । यसैगरी औद्योगिक तथा ब्यवसायिक विकासका लागि गाउँपालिका उद्योग वाणिज्य संघ तथा चेम्वर अफ कमर्शसँग साझेदारीको नीति लिइने अध्यक्ष कुँवरले उल्लेख गर्नुभयो । लगानी मैत्री तथा औद्योगिक पूर्वाधार सुदृढिकरण गर्दै उद्योग तथा पर्यटन विकासको नीति लिइने छ । राजस्व तथा आन्तरिक श्रोत परिचालनलाई नीति तथा कार्यक्रममा महत्व दिइएको छ ।
यसका साथै आर्थिक वर्ष २०८१÷०८२ को नीति तथा कार्यक्रम सर्वसम्मतले पारित भएको छ । यसैगरी यही असार १० गते आर्थिक वर्ष २०८१÷०८२ को बजेट सम्बन्धी १५ औं गाउँसभाको दोस्रो बैठक बस्ने घोषणासहित पहिलो वैठक सम्पन्न गरिएको गाउँपालिकाका अध्यक्ष कुँवरले घोषणा गर्नुभयो ।