असार २४, वालिङ
शनिबार दिउँसो स्याङ्जाको भीरकोट ५ मल्लगाउँमा गएको पहिरोले सिङ्गो गाउँ जोखिममा परेको छ । शनिबार दिउँसो ३ बजेको समयमा घरमाथिबाट एक्कासी पहिरो जाँदा ७२ वर्षीय खेमकुमारी मल्लको मृत्यु भएको थियो । शनिबार दिउँसोदेखि पहिरोमा पुरिएर बेपत्ता खेमकुमारीको शव आईतबार दिउँसो भेटिको हो । स्थानीयहरु र शसस्त्र प्रहरीकोे सहयातामा खोजीगरी भेटिएको थियो । 
पहिरोले अशोक मल्ल, सुरेश मल्ल, टोपबहादुर मल्ल, नेत्रबहादुर मल्ल, जनम मल्ल, दिपक राना, नन्दकुमारी सिंजालीको घर जोखिममा परेको छ । उक्त गाउँका घर परिवार वालिङ ११ को भोर्ले र अम्बारी गाउँमा छिमेकीको घरमा शनिबार रातिदेखि आश्रय लिएर बसिरहेका छन् । पहिरोमा पुरिएर एक व्याउनेसहित ३ वटा  भैँसी र १० वटा बाख्राहरु मरेका छन् । एक घर र दुई गोठ पहिरोले पुरिँदा ती चौपाय मरेका हुन् । भर्खरै शुरु भएको वर्षाले मानवीय तथा पशुचौपायमा क्षति भएपछि अबको हरेक वर्षाको समयले पिरोल्ने भएको छ । यो वर्षाभरी घरमा बास हुने हो की नहुँने हो भन्ने पिरलोमा सिंगो मल्ल गाउँ परेको छ । 
यसैक्रममा स्थानीय शोभा रानाले भन्नुभयो, “नहुँने घटना भईसक्यो अब बाँच्नेले कसरी ज्यान जोगाउने भन्ने मुख्य विषय बनेको छ । स्थानीय सरकारले यो गाउँलाई हेरोस ।’ हिँउदभरी पानीकै लागि पिरोलीने गाउँ अहिले वर्षाको पानीले ठूलो जनधनको क्षति भएपछि सिङ्गो गाँउ शोकमा डुबेको छ ।” 
एक गाग्री पानीको लागि दशकौँदेखि पिरोलिएको मल्ल गाउँ अहिले बर्षाको पानीले उठीबास नै बनाएपछि गाउँलेले थप जनधनको क्षति नहोस भन्नेमा स्थानीय सरकार केन्द्रित भएर थप कदम चलाउनुपर्ने स्थानीयले बताएका छन् । दुई छोराकी आमा खेमकुमारी गाउँमा निकै मिजासिलो र सहयोगी भावनाको हुनुहुन्थ्यो । केहि वर्ष पहिले श्रीमान गुमाउनुभएकी खेमकुमारीको अहिलेको वर्षाले ज्यान नै लग्यो । ठुली बुहारी र आँफू बस्दै आएको खेमकुमारी उक्त घटना हुनुभन्दा १० मिनेट अगाडि गाउँलेकै घरमा मकै खाएर आउनुभएको थियो । सुतिरहेकी बुहारीलाई उठाएर घरमा आएको भल तर्काउने बेला एक्कासी पहिरो आउँदा घरले च्यापिएर खेमकुमारीको मृत्यु भएको थियो भने बुहारी रीता मल्ल भागेर ज्यान जोगाउनुभएको स्थानीयले बताएका छन् । विदेश भएका छोरा आएपछि मात्रै शवको दाहसंस्कार गर्ने भएपछि खेमकुमारीको शव वालिङस्थित गह्रौँ प्राथमिक अस्पतालमा राखिएको छ ।