असोज ११, स्याङ्जा । 
कुनै पनि संघ संस्थाको विधान सभालाई विशेष महत्वकासाथ हेरिन्छ । किनकि संस्थागत विकासका लागि समय समयमा विधान संशोधनसहित नयाँ कार्यनीति तय गर्दैजानु आवस्यक हुन्छ । यहि मान्यता अनुसार राष्ट्रिय लोक तथा दोहोरीगीत प्रतिष्ठान नेपालको २४औं केन्द्रीय वार्षिक साधारणसभा तथा विधान अधिवेशन गण्डकी प्रदेशको पोखरामा आज समुद्घाटन हुँदै छ । आज र भोलि गरी दुईदिनसम्म चल्ने विधान अधिवेशनले प्रतिष्ठानलाई नयाँ उचाई दिने अनुमान गरिएको छ । संस्थाका नीतिगत कुराहरुलाई समयको माग र आवस्यकतालाई मध्येनजर गर्दैजानुले संस्थागत महत्व राख्दछ ।
२०५८ सालमा स्थापना भएको प्रतिष्ठानले २४ वर्षे संस्थागत इतिहास निर्माण गरिसकेको छ । यो साधारणसभा तथा विधान अधिवेशनमा प्रतिष्ठानका पदाधिकारी, जिम्मेवार सदस्य एवम् सरोकारवालाहरुले आ—आफ्ना तर्फबाट संस्थाको भावी कार्य दिशाका सन्दर्भमा विचारहरु राख्नेछन् । 
यसै सन्दर्भमा प्रतिष्ठान गण्डकी प्रदेशका वरिष्ठ उपाध्यक्ष पूर्ण परियारले कार्यक्रमको भव्य सफलताको कामना सहित बिभिन्न २५ बुँदे सुझाव मिडिया मार्फत सार्वजनिक गर्नुभएको छ ।
सुझावसँगै विगतका साधारणसभा र विधान अधिवेशनहरु भन्दा अझै यो उत्सव बेग्लै र प्रतिष्ठानको इतिहासमा सम्झना लायक रहने वरिष्ठ उपाध्यक्ष परियारको विश्वास छ । परियार भन्नुहुन्छ, “अबको महाधिवेशन कस्तो बन्ने ? अबको महाधिवेशनसम्म पुग्दा के कस्ता तयारी गरेर जाने भन्ने विशेष तयारीको बेला यही विधानसभालाई उपयोग गर्नुपर्दछ । हामीले संस्था कस्तो बनाउन चाहन्छौ, त्यसको चित्र कोर्ने बेला यही हो । त्यसैले समयलाई भरपुर उपयोगगरी घनिभुत छलफल गर्न जरुरी देखिन्छ ।”
साधारणसभाको शुभकामना सहित वरिष्ठ उपाध्यक्ष परियारका सुझाबहरु यस्ता छन् ः
१.जिल्ला प्रदेश र केन्द्रमा संरक्षक र सल्लाहकारहरुको संख्या र योग्यता के हुने स्पष्ट हुनेगरी विधानमै लेख्ने या विधान सम्मत बिनियम बनाएर जाने छलफल हुन जरुरी छ ।
२.मौलाउदै गरेको प्रत्यक्ष दोहोरी उत्पादक कम्पनी तथा च्यानल र कलाकारहरुप्रति राष्ट्रिय लोक तथा दोहोरीगीत प्रतिष्ठानको धारणामा लेख्ने या कार्यनीतिमा हुनुपर्ने गरी अब बहस र छलफल गर्ने बेला आएको छ ।
३.राज्यले नै संगीत बिकासबोर्ड र यसको सेन्सर गर्ने आँट नगरेको वा जरुरी नठानीरहेको अवस्थामा, विकृती न्यूनीकरण समिति त हाम्रो संस्थाभित्र छ तर यो समितिका प्रयासलाई र मान्नैपर्ने औचित्यहरुको बारेमा बृहत् छलफल हुनुपर्ने देखिन्छ । साथै समितिको कार्यविधि अहिलेसम्म के छ छैन भने स्पष्ट हुनु जरुरी छ । त्यसैले यो साधरणसभाले छलफल गर्न सक्नुपर्छ र नीतिको व्यवस्था हुनुपर्दछ ।
४. सरकारसँग अबको प्रतिष्ठानको सम्बन्ध के हुने ? लोकदोहोरी बिकास बोर्ड गठनलगायत कलाकारका पक्षमा सरकारले हेर्ने विषयहरुकाबारेमा पैरवी गरिरहने संस्था हुनेकी दर्ता अनुसार राज्यको एउटा गैरसरकारी संस्था मात्रै हुने बारेमा स्पष्ट नीति हुनु जरुरी छ ।
५. प्रतिष्ठानको अहिलेसम्मको अभ्यास अधिवेशन, महाधिवेशनका बेला एकपटक त्यो पनि सधैं पहिलो र अन्तिम पटक सदस्यता वितरण गर्ने अभ्यास गरिँदै आइएको छ । अब कोष निर्माणका लागि सदस्यता वितरण गर्ने परम्परालाई संशोधन गर्दै संगठीत सदस्यहरुको अध्यावधी गर्नेगरी निवर्तमान गण्डकी प्रदेश समितिले मेरो संयोजकत्वमा एउटा ढांचा तयार गरेको थियो, कति पूरा भएका छन् होला त कति तत्काल बाँकी रहे । यो संस्थाको सदस्यता लिएको कहिले हो ? को पुरानो हो ? को नयाँ ? यसको लेखाजोखा हुनेगरी दस्ताबेजीकरण हुन जरुरी छ । साथै सदस्यता सम्बन्धी व्यवस्थालाई संशोधन गर्नुपर्ने अबको आबश्यकता हो । त्यसैले हामीले बिगतमा गरेका लिखत व्यवस्थालाई कार्यान्वयनमा लैजाऔं, कलाकरितामा लागेका व्यक्तिहरुलाई मात्रै सदस्यता दिने प्रण गरौं । साथै सदस्यताको अध्यावधिक विवरण अनलाइन तथा संस्थाको आधिकारिक वेबसाइटमा उपलब्ध गराउने व्यवस्था हुन सके संस्थामा सुशासनको उदाहरण दिने नजिर हुनेछ ।
६.आजीवन सदस्यता वितरणको मापदण्ड, योग्यता तथा अधिवेशन महाधिवेशनमा प्रतिनिधित्वकाबारेमा बृहत् छ्लफल गरिनुपर्ने अबको आवश्यकता हो ।
७.प्रदेश समितिमा महासचिव र २ जना सचिवको व्यवस्था हुनेगरी विधानमा  समावेश गर्न जरुरी देखिन्छ ।
८.व्यक्तिलाई संरक्षण गर्ने प्रक्रियाबाट माथि उठेर विधिलाई कामकाजी बनाउनेतर्फ सोच्नु जरुरी हुन्छ । त्यसैले केन्द्रीय समितिमा सचिवहरुको संख्या घटाएर महासचिव र सचिव २ जना मात्रै हुँदा कार्यकारी बन्ने देखिन्छ । प्रदेश संयोजन गर्ने समन्वयकारी जिम्मेवारी प्रदेश कोटामा निर्वाचित केन्द्रीय सदस्यलाई प्रदानगरी कार्यकारी भूमिका प्रदान गर्न जरुरी देखिन्छ । यसो गर्दा जिम्मेवारीको दुविधा घट्दछ ।
९.जिल्ला समितिहरुले संघीयताको मर्म अनुरुप अब सम्भव हुने पालिकाहरुमा स्थानीय प्रतिष्ठान गठन गर्न पाउने सुबिधा खुल्ला छोड्नेगरी नीतिको व्यवस्था गर्नुपर्छ ।
१०.केन्द्रीय उपाध्यक्षहरु या त प्रदेश अनुरुप जिम्मेवारी दिनेगरी ७ जनाको परिकल्पना गरिनुपर्छ या त वरिष्ठ प्रथम र द्वितीय उपाध्यक्ष हुँदा नै ठीक हुने यो विषयमा पनि छ्लफल गर्न सके महाधिवेशनलाई सहज हुनेछ ।
११.यो गरिमामय सभाले सकेसम्म प्रतिष्ठान निर्वाचन कार्यविधि नै बनाएर समाबेशी समिति बनाउने तर्फ पनि ध्यान दिन जरुरी छ ।
१२ केन्द्रीय समितिमा प्रतिनिधित्व गर्ने सदस्य पदाधिकारीले उम्मेदवारी दर्ता गर्दा सम्बन्धित जिल्ला या प्रदेशबाट सिफारिस भएको हुनुपर्ने व्यवस्था गर्न सके जिल्लाप्रति जवाफदेहिता बढ्ने छ ।
१३. प्राविधिक कारण संस्थाको माया मुटुमा बोकेर बाहिर रहनेहरुको अस्तित्वलाई स्वीकार गर्न सक्नुपर्ने कार्यनीतिको लागि बहस र छलफलगरी स्पष्ट नीति बनाउन सक्नुपर्दछ । यसो गर्दा संस्थाले कसैलाई पनि गुमाउनु पर्दैन । निवर्तमान र पूर्व पदाधिकारीको बरियाताक्रमको जसरी व्यवस्था भएको छ, त्यसलाई कार्यान्वयन गर्नका लागि यो सभामा बृहत् छलफल हुँदा भविष्यमा विगतका कमजोरी दोहोरिने सम्भावना घटेर जान्छ ।
१४.पुरस्कार तथा सम्मानमा सहज बनोस भन्ने उद्देश्यले हामीले गण्डकी प्रदेशमा हरेक पुरस्कार तथा सम्मानका लागि कार्यविधि बनाएर कार्यन्वयनको सोच शुरु गरेका थियौं । सायद केन्द्र तथा अन्य प्रदेश र जिल्लाहरुमा यो विधि उपयुक्त हुनसक्ने देखिन्छ । जसका कारण पुरस्कार तथा सम्मानको आँफैमा सम्मान देखिन्छ । त्यसैले सम्मान तथा पुरस्कार ब्यबस्थापन कार्यविधिका लागि सभाले अनुमती लिनु सान्दर्भिक देखिन्छ ।
१५.दोहोरीगीत प्रतिष्ठानले प्रतियोगिता गर्नुपर्छ, यो हाम्रो पहिचान हो । तर परिवार बढ्यो संस्था झांगिदै गयो, अब यसलाई सहि मार्गमा हिडाउनका लागि ,परिमार्जित संस्थागत आचारसंहिता तयारगरी समय समयमा प्रशिक्षण, खोज अनुसन्धान र प्रकाशन जस्ता प्राज्ञिक कार्यहरु गर्न जरुरी छ । ७ जेठ २०८० देखि वेबसाइट नै अपडेट भएको जस्तो देखिदैन । अबका संस्थाहरु प्रविधिमैत्री हुन जरुरी छ । त्यसैले कारोबार डिजिटल बनोस्, कार्यशैली डिजिटल बनोस र एउटा विश्वविद्यालय जत्तिकै गरिमा बोकेको यो संस्थाका हरेक गतिविधी आफ्नो वेबसाइटमा अपडेट भइरहनेगरी ब्यवस्थापन गर्न जरुरी देखिन्छ । विद्वान र बुद्दिजिवीको जमघट हुने यो साधारणसभाले अब यो वर्ष गरिने कामहरुको खाका तयार गर्नुपर्छ । 
संस्थालाई जति साझा बनाउन सक्यो, त्यति उचाई बढ्ने सोचका साथ प्रतिष्ठानको उचाइ र गरिमा बढाउन हामी सबैलाई प्रेरणा मिलोस साधारणसभा भव्य सफलताको शुभकामना ।