चैत २८, वालिङ ।
चर्चित गायक एवम् मोडल राजेश भण्डारीको नयाँ लोकदोहारीगीत ‘अटोवाला दाई’ को छायाङ्कन अन्तिम चरणमा पुगेको छ ।
आफ्नै गृह जिल्ला स्याङ्जाका विभिन्न स्थानमा छायाङ्कन गरिएको लोकदोहारीगीत अटोवाला दाईको छायाङ्कन अन्तिम चरणमा पुगेको गायक भण्डारीले बताएका छन्  ।बुधबार प्रशिद्ध धार्मिक एवम् पर्यटकीय स्थल गह्रौंसुर र वालिङ बजारको चोकमा अटोवाला दाईको छायाङ्कन गरिएको थियो । नयाँवर्षको शुभारम्भसँगै यही आउने वैशाखको पहिलो साता सार्वजनिक गरिने गायक भण्डारीले जानकारी गराएका छन् ।राष्ट्रिय लोक तथा दोहोरीगीत प्रतिष्ठान स्याङ्जाका सचिवसमेत रहेका भण्डारीका अनुसार अटोवाला दाईमा मायाँ प्रेमकासाथै समसामयिक विषयलाई समेटिएको छ । यो म्युजिक भिडियोमा बाल कलाकार रोहानी श्रेष्ठ र आयुशा खत्रीको नृत्यसमेत देख्न पाइने छ ।
 ‘कलेजीको छेउ’ को सफलतापछि भण्डारीको ‘अटोवाला दाई’ अर्को नयाँ कोशेली हो । त्यसो त गायक भण्डारीका पञ्चेबाजा, सालैजो, तीजका कोशेलीलगायत आधा दर्जन म्युजिक भिडियोहरु यस अघि सार्वजनिक भैसकेका छन् । अटोवाला दाईमा मुख्य अभिनय स्वयम् राजेश भण्डारी, भूमिका पङ्गेनी, जेरी भण्डारी र सलिना थापाको रहेको छ । यो म्युजिक भिडियोमा गायक भण्डारीको आफ्नै लय तथा शव्द सङ्कल रहेको छ भने स्वरमा साथ दिएका छन् हेमराज र शान्तारानी परियारले । म्युजिक भिडियोको कोरियोग्राफी जेरी भण्डारीको र रेकर्डिङ ‘वानडे एचडी’ स्टुडियोमा गरिएको हो ।