वैशाख २७, वालिङ ।
नेपाल सरकारका मुख्य सचिव एकनारायण अर्यालले विकास निर्माणको सवालमा राजनीति गर्न नहुँने बताउनुभएको छ । शनिबार गह्रौँसुर धार्मिक तथा पर्यटकीय केन्द्र तथा गह्रौँसुर मन्दिर परिसरमा नवनिर्मित अतिथि गृहको उद्घाटन गर्दै मुख्य सचिव अर्यालले विकास निर्माणको क्षेत्रमा राजनीति गरेमा उक्त क्षेत्र पछाडि पर्ने बताउनुभयो । उहाँले भन्नुभयो, “विकास निर्माणमा सबै एकजुट हुँन आवश्यक छ । विकासको सवालमा जहिल्यै पनि सहमति र सहकार्यको आवश्यकता पर्छ । विकासमा राजनीति गरियो भने पछाडि परिन्छ ।” विकासमा आग्रह पुर्वाग्रह छाडेर अगाडि बढ्न आवश्यक रहेकोमा मुख्य सचिव अर्यालको जोड छ ।
स्याङ्जाको विकासका लागि आफ्नो पहिलो प्राथामिकता रहेको र यहाँको विकास निर्माणका लागि आफ्नो तर्फबाट सँधै सहयोग र सदभाव रहने प्रतिवद्धता व्यक्त गर्नुभयो । कार्यक्रममा शहरी विकास मन्त्रालयका सचिव गोपाल सिग्देल, वालिङ नगरपालिका प्रमुख कृष्ण खांण, गल्याङ नगरपालिका प्रमुख गुरुप्रसाद भट्राई, जिल्ला समन्वय उपप्रमुख खड्कराज सुवेदी, सिटि एक्सप्रेस कम्पनीका गण्डकी अध्यक्ष हेमबहादुर गुरुङलगायतले विकास निर्माणका सन्दर्भमा यो वा त्यो नभनीकन सबै मिलेर लाग्नुपर्ने धारणा राखेका थिए ।