जेठ १, वालिङ ।
स्याङ्जाको बिरुवा गाउँपालिका सबैभन्दा कम बेरुजु कायम हुनेमा परेको छ । योसँगै कम बेरुजु कायम हुनेमा जिल्लामै प्रथम भएको छ ।
महालेखा परीक्षकको कार्यालयको वार्षिक प्रतिवेदन अनुसार आ.व.२०८०÷०८१ को आर्थिक कारोबारको अन्तिम लेखा परीक्षणमा सबैभन्दा कम बेरुजु कायम हुनेमा परेको हो । कूल कारोबारको ०.१२% बेरुजु कायम भई स्याङ्जा जिल्लाका स्थानीय तहहरु मध्ये बिरुवा गाउँपालिका सबै भन्दा कम बेरुजु कायम भई प्रथम भएको छ ।
स्याङ्जाका ११ पालिकामा बिरुवाको आ.व.२०८०÷०८१ को आर्थिक कारोबारको अन्तिम लेखा परीक्षणले सबैभन्दा कम बेरुजु कायम हुनेमा परेको गाउँपालिकाका अध्यक्ष सूर्यबहादुर कुँवरले जानकारी दिनुभयो ।
यसैगरी गण्डकी प्रदेशका स्थानीय तहहरु मध्ये तेस्रो स्थानमा रहन सफल भएको छ । यस अवसरमा कार्यालयको टिम, जनप्रतिनिधिहरु, कर्मचारी एवं सरोकार वाला सबैमा धन्यवाद व्यक्त गर्दछु, अध्यक्ष कुँवरले सामाजिक सञ्जाल मार्फत भन्नुभएको छ ।
यसैगरी जिल्लामा कम बेरुजु कायम हुनेमा दोस्रो स्थानमा कालीगण्डकी गाउँपालिका रहेको छ । कालीगण्डकीले कूल कारोबारको ०.२४ प्रतिशत बेरुजु रहेको महालेखाले निकालेको छ । यस्तै फेदिखोला गाउँपालिकाको कूल कारोबारको ०.३४ प्रतिशत कायम भई जिल्लाका स्थानीयतह मध्ये बेरुजु कम हुनेमा तेस्रो स्थानमा रहेको छ ।
अर्जुनचौपारी गाउँपालिकामा कूल कारोबारको ०.३७ प्रतिशत हुँदा पुतलीबजार नगरपालिकाको ०.६१ प्रतिशत बेरुजु देखिएको छ । गल्याङ नगरपालिकाको ०.६६ प्रतिशत बेरुजु देखिएको छ भने आँधिखोला गाउँपाकिाको ०.७८ प्रतिशत बेरुजु रहेको छ । भीरकोट नगरपालिकाको ०.८० प्रतिशत, वालिङ नगरपालिकाको १.०१ प्रतिशत र चापाकोट नगरपालिकाको २.०४ प्रतिशत बेरुजु देखिएको छ । यसैगरी सबैभन्दा बढी हरिनास गाउँपालिकाको ४.६३ प्रतिशत बेरुजु कायम भएको लेखा परीक्षणको प्रतिवेदनले देखाएको छ ।
स्याङ्जाका ५ नगरपालिकाहरुमा कम बेरुजुमा पुतलीबजार रहेको छ भने बढि बेरुजु कायम हुनेमा चापाकोट रहेको महालेखाको प्रतिवेदनले देखाएको छ ।
