असार–१६, वालिङ ।
पछिल्लो समय विभिन्न चाडबाड जस्तै असार १५ लाई पनि विशेष पर्वकारुपमा मनाउने कार्यक्रम हुदै आएको छ । मानो रोपेर मुरी उव्जाउने महिनाकारुपमा असर महिनालाई लिइन्छ । असार पन्ध्रलाई धान दिवसकारुपमा विगत २१ वर्षदेखि मनाउन थालिएको हो । यसै अनुसार हिजो आइतबार १५ गते देशभर २२ औं धान दिवस मनाइएको छ । स्थानीय पालिका, सम्बन्धित कार्यालयका प्रतिनिधि, समाजसेवीहरुको सहभागितामा यो वर्षको धान दिवस औपचारिकरुपमा मनाइएको विभिन्न सञ्चार माध्यमले उदृत गरेका छन् ।
यसैबीच स्याङ्जाको बिरुवा गाउँपालिकाले पनि धान दिवस मनाएको छ । बिरुवा गाउँपालिका–१, म्याङखोला पुल नजिकै २२ औं राष्ट्रिय धान दिवस भव्य रुपमा सम्पन्न गरिएको छ । “धान बालीमा सघनता, खाद्य सुरक्षा र आत्मनिर्भरता“ भन्ने नाराका साथ आयोजित कार्यक्रम गाउँपालिकाले आयोजना गरेको हो ।
कार्यक्रमका प्रमुख अतिथि गाउँपालिकाका अध्यक्ष सूर्यबहादुर कुँवर रहनु भएको थियो ।
अध्यक्ष कुँवरले कृषिमा आधुनिकता र सघनता ल्याएर आत्मनिर्भर बन्नुपर्ने आवश्यकतामाथि जोड दिनुभयो । उहाँले स्थानीय उत्पादन प्रवद्र्धन गर्न र कृषकहरूको जीवनस्तर उकास्न गाउँपालिकाले निरन्तर सहकार्य गरिरहेकाले कृषकहरूमा उत्साह थपिएको विश्वास व्यक्त गर्नुभयो ।
कार्यक्रममा कृषक, स्थानीय जनप्रतिनिधि, विद्यालयका विद्यार्थी तथा कृषि प्राविधिकहरूको उल्लेख्य सहभागिता रहेको थियो । धान रोपाइँ, लोकनृत्य तथा कृषि प्रविधिका बारेमा जानकारीमूलक सत्रहरू कार्यक्रमको आकर्षण बने । बिरुवा गाउँपालिकाले हरेक वर्ष असार १५ का दिन राष्ट्रिय धान दिवस मनाउँदै आएको छ । यस्ता कार्यक्रमले कृषकहरूमा नयाँ उर्जा थपेको स्थानीयको प्रतिक्रिया रहेको छ ।
