माघ १, पैयूँ । 'द निर्भीक फाउन्डेशन'ले जोखिम बस्ती स्थानान्तरण गरी सुरक्षित बस्ती निर्माणको शिल्यान्यास गरेको छ ।
पर्वतको पैयुँ गाउँपालिका वडा नम्बर ५ भुर्तेलथोक आरुगैह्रामा अवस्थित दलित बस्ती पहिरोको उच्च जोखिममा रहेको र उक्त समुदायका नागरिकको आर्थिक अवस्था पनि नाजुक भएका कारण उक्त बस्ती स्थानान्तरण गरी बस्ती निर्माण कार्यको शिल्यान्यास गरेको हो ।
स्थानीयबासिन्दाको उपस्थितिमा पैयूँ गाउँपालिकाका उपाध्यक्ष जसमती गुरुङ र पैयूँ गाउँपालिका वडा नम्बर ५ का अध्यक्ष उमाकान्त भुर्तेलले सुरक्षित बस्ती निर्माणको शिल्यान्यास गर्नुभएको हो ।
बस्ती शिल्यान्यास गर्दै पैयूँ गाउँपालिकाका उपाध्यक्ष जसमती गुरुङले फाउन्डेशनले विपन्न तथा पहिरोको जोखिममा परेकाको लागि बस्ती निर्माण सुरु गरेर सह्रानीय काम गरेको भन्दै गाउँपालिकाले पूर्ण रुपमा सहयोग गर्ने बताउनु भयो । गुरुङले मानव जीवन रक्षार्थ सुरु गरिएको बस्ती निर्माण कार्यको खुलेर प्रशंसा गर्नु भयो ।
उहाँले बस्ती निर्माण कार्यमा गाउँपालिकाले पनि सहयोग गर्ने बताउदै बस्ती निर्माण कार्यमा सबैले साथ दिनु पर्ने बताउनु भयो ।
शिल्यान्यास कार्यक्रममा पैयूँ गाउँपालिका वडा नम्बर ५ का अध्यक्ष उमाकान्त भुर्तेलले वर्षौ देखि भिरमा रहेको जोखिम बस्तीलाई स्थानान्तरण गरी घर बनाउन लागेको कार्यलाई धन्यवाद प्रकट गर्दै सोही कार्यलाई निरन्तरता दिन आगामी आर्थिक वर्षमा वडाले बजेट नै छुट्याएर बस्ती स्थानान्तरणमा सहयोग गर्ने बताउनु भएको छ ।
जोखिम बस्तीमा रहेका दलित परिवारका लागि १५ वटा घर निर्माण गर्ने योजना रहेको द निर्भीक फाउन्डेशनका अध्यक्ष निर्भीक नारायण भुर्तेलले बताउनुभएको छ ।
