चैत्र १२, वालिङ । ‘हाम्रा अग्रज उज्ज्वल भविश्यका मार्ग दर्शक अग्रजहरुलाई तिरस्कार होइन माया र सम्मान गरौ’ भन्ने मूल नाराका साथ वालिङ ५ मा विहिबार सम्म २ सय जना जेष्ठ नागरिकलाई सम्मान गरिएको छ ।
वडाले जेष्ठ नागरिक सम्मान अभियान नै सञ्चालन गरी वडाका विभिन्न टोलटोलमा गएर जेष्ठ नागरिक सम्मान गरेको हो । विहिबार जर्कोटमा कार्यक्रम गरिएको थियो । जेष्ठ नागरिक सम्मान स्वरुप निःशुल्क दीर्घ रोग, रक्तचाप, मधुमेह मृगौला रोग तथा मोटोपन सम्बन्धी परिक्षण गरिएको थियो ।
जेष्ठ नागरिकलाई स्वस्थ र दिर्घायू राख्न सकियो भने उहाँहरुको विचार र अनुभवले सभ्य समाज निर्माणमा सघाउ पुग्ने भन्दै वडाले विभिन्न टोलटोलमा पुगेर जेष्ठ नागरिक सम्मान स्वरुप स्वास्थ्य परिक्षण गरिएको नगरकार्यपालिका सदस्य जमुना केसीले जानकारी दिनुभयो ।
शुक्रबार सम्म चल्ने कार्यक्रममा वडाका ढाईसय जना जेष्ठ नागरिकहरुको स्वास्थ्य परिक्षण हुनेछ ।
