चैत १९, वालिङ । स्थानीय उद्योग व्यवस्थापन तथा नियमन सम्बन्धी कानुनको मस्यौदा विषयक छलफल कार्यक्रम विहिबार वालिङ नगरपालिकामा सम्पन्न भएको छ । वालिङ नगरपालिकाको आयोजना, उपभोक्ता हित संरक्षण मञ्च नेपालको प्राविधिक सहयोग र द एशिया फाउण्डेसनको सहकार्यमा मस्यौदा विषयक छलफल गरिएको हो ।
कार्यक्रममा वालिङ नगरपालिका प्रमुख दिलीपप्रताप खांणले ऐन अध्ययन गरेर छलफल गरी नगरसभाबाट पारित गरिेर कार्यान्वयनमा ल्याउने बताउनुभयो । साथै यो ऐनलाई कार्यान्वयनमा ल्याउन सरोकारवालहरुको समेत उत्तिकै महत्वपूर्ण भूमिका रहने बताउँदै आवश्यक सहयोग गर्न आग्रह गर्नुभयो ।
कार्यक्रममा उपप्रमुख कल्पना तिवारीले ऐन कार्यान्वयनमा ल्याउन चरणबद्ध रुपमा आवश्यक छलफल गरी नगरपालिका अगाडि बढ्ने बताउनुभयो ।
त्यस्तै प्रमुख प्रशासकिय अकिृत राजन भट्टराईले यहाँका स्थानीयको परिवेश, वातावरण सुहाउँदो ऐनहरु निर्माण गरी कार्यान्वयमा ल्याउन सजिलो हुने बताउनुभयो ।
कार्यक्रममा उपभोक्ता हित संरक्षण मञ्च नेपालका केन्द्रीय सचिव भुवन निरौलाले मस्यौदामाथि प्रस्तुतिकरण गर्नुभएको थियो भने मञ्चका स्थानीय कार्यक्रम अधिकृत निर्भीक नारायण भुर्तेलले कार्यक्रमको सहजीकरण गर्नुभएको थियो ।
