मंसिर १९, पर्वत । “स्वस्थ माटोको साथ, खाद्य उत्पादनको सुरुवात” भन्ने नारासहित नवौं विश्व माटो दिवस–२०७९ मनाइएको छ । कृषि ज्ञान केन्द्र पर्वतको आयोजनामा र पैयूँ गाउँपालिका पर्वतको समन्वयमा पैयूँमा विश्व माटो दिवस मनाइएको हो ।
माटो परीक्षण शिविर कार्यक्रममा गाउँपालिकाको ७ वटै वडाबाट माटोको १ सय २ नमुना परीक्षण गरिएको छ ।
संकलित नमुना परीक्षणको नतिजामा नाइट्रोजन, फसफोरस र पोटासको मात्रा धेरै नमुनामा कम पाइएको कृषि ज्ञान केन्द्र पर्वतका प्रमुख मनिता थापाले जानकारी दिनु भयो ।
नतिजामा २५ प्रतिशत नमुनामा अम्लीय समस्या, ७५ प्रतिशत तटस्थ, ९५ प्रतिशत माटोमा नाइट्रोजनको कमी देखियो । ८० प्रतिशत माटोमा फस्फोरस कम र सबै नमुना माटोमा पोटासको मात्र कम रहेको प्रमुख थापाले बताउनु भयो ।
नतिजाको आधारमा विभिन्न बालीमा नाइट्रोजन, फसफोरस र पोटासको मात्रा सिफारिस गरिएको छ भने पि एच मान को आधारमा कृषि चुनको मात्रा सिफारिस गरिएको छ ।
सिफारिस गरिए अनुसार कृषि चुन र सन्तुलित मलखाद कृषकले अवलम्बन गरेमा माटोको अवस्थामा सुधार हुने थापाको भनाई छ ।
कार्यक्रममा पैयूँ गाउँपालिकाका अध्यक्ष तोरण मल्ल ठकुरी, उपाध्यक्ष याम कुमारी राना लगायत जनप्रतिनिधि र कृषकहरुको उपस्थितिरहेको थियो ।
