मंसिर २१। पर्वत। पैयूँ गाउँपालिका वडा नम्बर ६ को नव निर्मित वडा कार्यालय भवनको उद्घाटन सम्पन्न भएको छ । भवनको उद्घाटन गण्डकी प्रदेश सरकारका उद्योग तथा पर्यटन, मन्त्री मित्रलाल बस्यालले एक भव्य समारोहका बीच सम्पन्न गर्नुभयो।
प्रमुख अतिथि मन्त्री बस्यालले उद्घाटन कार्यक्रमलाई सम्बोधन गर्दै स्थानीय तहको सेवा प्रवाहलाई प्रभावकारी बनाउन नयाँ कार्यालय भवन महत्वपूर्ण उपलब्धि भएको बताउनुभयो। उहाँले भन्नुभयो, “स्थानीय सरकारले जनताका अपेक्षा पूरा गर्ने महत्वपूर्ण आधार कार्यालय भवनहरू हुन्। यस भवनबाट जनतालाई सहज, छरितो र पारदर्शी सेवा प्रदान गर्न स्थानीय प्रशासनलाई थप प्रेरणा मिल्नेछ।” उहाँले स्थानीय विकास र समृद्धिका लागि नागरिक र जनप्रतिनिधिबीचको सहकार्य अपरिहार्य रहेको समेत जोड दिनुभयो।
जग्गा दाताहरूलाई सम्मान
कार्यक्रममा वडा कार्यालय निर्माणका लागि जग्गा दान गर्नुभएका जय नारायण तिवारी, नीलकण्ठ तिवारी, कृष्ण तिवारी, दीपक तिवारी, र थानेश्वर तिवारीलाई दोसल्ला र प्रमाणपत्र प्रदान गरी सम्मान गरिएको थियो। सम्मानित व्यक्तित्वहरूको योगदानले यो भवन निर्माण सम्भव भएको भन्दै सबैले प्रशंसा व्यक्त गरे।
विशिष्ट अतिथिहरूको शुभकामना मन्तव्य
पैयुँ गाउँपालिकाका अध्यक्ष तोरण मल्ल ठकुरी, उपाध्यक्ष याम कुमारी राना, र विभिन्न राजनीतिक दलका प्रतिनिधिहरूले नयाँ भवनले वडा नम्बर ६ का नागरिकलाई सेवा प्रदान गर्न थप सहज हुनेमा विश्वास व्यक्त गर्दै शुभकामना व्यक्त गरे।
सभाध्यक्षको प्रतिबद्धता
कार्यक्रमको सभापतित्व वडा अध्यक्ष गंगाधर अधिकारीले गर्नुभयो। उहाँले वडा कार्यालयबाट जनताका समस्या छिटो छरितो तरिकाले समाधान गर्दै पारदर्शिता कायम राखेर सेवा प्रवाह गरिने प्रतिबद्धता व्यक्त गर्नुभयो।
स्थानीयको उल्लेखनीय सहभागिता
उद्घाटन कार्यक्रममा स्थानीय बासिन्दाहरूको उल्लेखनीय सहभागिता रहेको थियो। कार्यक्रममा सांस्कृतिक प्रस्तुतिहरूले झन् रौनक थपेको थियो। सबै सहभागीहरूले यो भवनले स्थानीय विकास र सेवा प्रवाहमा महत्त्वपूर्ण भूमिका खेल्ने विश्वास व्यक्त गरे।
